"समाजात घडणाऱ्या विविध घटनांवर मला बोलल्याशिवाय राहवत नाही. ते मी माझ्या लेखणीतून बोलतो, लिहितो. श्रीमंतीचा तसेच राजकीय वरदहस्त असलेली तरुण पोरं दारू पिऊन बेफाम गाडी चालवून पदपथावर झोपलेली माणसं चिरडतात, सावकारमंडळी कर्ज देऊन कर्ज घेणाऱ्यांवर आत्महत्येची वेळ आणतात. उच्चशिक्षित लोक बुवाबाजीला बळी पडतात. कौटुंबिक वाद आणि गैरसमज यामुळे भांडणं होतात. चांगल्या आईबापाची पोरं वाईट संगतीमुळे गुन्हेगारी विश्वात पोहोचतात. स्त्रियांचे आरोग्य, लैंगिक छळ, डॉक्टरांकडून होणारी रुग्णांची फसवणूक, रस्त्यांवरील खड्डे, पिण्याच्या पाण्याची नासाडी, रस्त्यावर फेकला जाणारा कचरा अशा अनेक अवतीभोवती रोज घडणाऱ्या कौटुंबिक, सामाजिक, राजकीय घटनांचा परिणाम इतरांवर होतो तसा माझ्यावरही होतो. तो मी माझ्या लेखणीतून बोलतो. मला लिहिल्यावाचून राहवत नाही म्हणून मी लिहितो."